有「魔鬼濕柴」之稱嘅彭丹，近年轉戰內地，甚少喺香港公開露面。早前丹丹好低調咁嚟香港出席一個電影節活動，由於大會公布嘅嘉賓名單上冇佢個名，所以小小So都唔知佢會出現。活動開始咗一段時間，嘉賓魚貫進場，小小So發現有個悉心打扮、着低胸吊帶裙嘅內地女士出現，最初大家都唔知佢係乜水，不過因為佢着得好性感，令在場嘅男嘉賓開始對佢評頭品足，不過好耐都未有結論。
過咗好耐之後，終於有人估到呢位艷女原來係彭丹，小小So同丹丹都算有啲交情，所以就抱住懷疑心態去同呢位「疑似丹丹」傾偈，但係小小So傾咗一輪都唔覺佢係彭丹，直到佢話近嚟喺內地拍緊套戲扮演「春姑」（村姑），小小So即刻如夢初醒，驚覺眼前故人！
小小So心裏面充滿問號，惟有靜靜雞問吓呢位個眼、耳、口、鼻都好似唔同咗嘅「疑似丹丹」係咪「修葺」過，但係佢誓神劈願咁話冇整容，只係因為套戲增肥。肥得咁集中，小小So都無話可說！其實呢個年代整容好平常，就連「人造美女」都有比賽啦！