04/11/2009

播放本新聞相關短片

城城絕情表態寸杧小題大做

近日王秀琳狂借與郭富城的緋聞上位,不過城城昨日終於親手「滅杧」:「王小姐唔係我緋聞女友!」更寸她小題大做!

自城城爆出「偷杧事件」後,王秀琳(Mango)與熊黛林(Lynn)經常隔空開火,上月城城44歲生日,Mango趁Lynn在內地拍戲期間,自爆傳短訊賀城城生日,並獲即時回覆,擺明挑戰Lynn的正印地位!經過多日沉默,城城昨日與另一緋聞女友舒淇出席《溥儀1881》眼鏡旗艦店開幕時,終於打破沉默,指有人小題大做,踢爆Mango會錯意,終止這段關係!同時他形容與Lynn的關係為「好多嘢唔使解釋」,天王嫂地位明顯升呢!

城:郭富城 記:記者

記:今年生日,好朋友有冇送禮物?

城:(邊講邊冧笑)好多人都有送,總之我喺香港好多朋友都同我食飯,唔喺香港嗰啲都有送,不過就唔好講,咁私人嘅嘢!

記:係咪講緊唔喺香港嘅Lynn?

城:唔知呢!

記:送番副眼鏡畀佢?

城:(一臉得戚)唔會喎!唔話你聽呀呢啲!

記:舒淇話同你夾緋聞喎!

城:其實緋聞呢……就算係普通朋友都會畀人傳,某部分傳媒會誤導觀眾,將普通朋友演變成緋聞女友!

「唔熟嘅朋友都會覆!」

記:你知唔知Mango有首新歌?

城:唔係好清楚!

記:叫普通女性唔好講咁多嘢?

城:其實對方有好多想法係控制唔到嘅!一啲唔係經常聯絡都冇得控制囉!總之當日大家喺新聞上見到,我生日嗰日有出嚟食飯嗰班,就係我好好朋友。普通朋友,唔太熟、又搵我唔到嗰啲呢,都有傳短訊祝我生日快樂,基於禮貌上,我每一個唔熟嘅朋友,我都會逐一覆佢哋!但呢一樣嘢最後就變成是非,覺得係小題大做,王小姐唔係我緋聞女友!

記:你覺得佢諗多咗?

城:(語氣好肯定)會!

記:減少同佢接觸?

城:不嬲都少接觸o架啦!

記:向Lynn派定心丸喎!

城:(冧笑)使乜定心丸啫?同Lynn係好朋友,好多嘢唔需要去解釋!佢明就明,唔明就唔明!

失落金馬獎感失望

記:今屆未能入圍金馬獎影帝,有冇失望?

城:係有失望,但係好快就調整番!其實初初估自己有份入圍,亦估舒淇都會入圍,不過冇辦法,每個評審有唔同準則!

記:內地將電影《殺人犯》改片名為《罪與罰》,點睇?

城:因為驚小朋友入唔到戲院,而古仔係兩個結局,不過個中心點都係一樣!

對於城城親手滅杧,Lynn經理人Kim說:「我唔理Lynn嘅私人嘢,你都係問番佢自己回應啦!」而Mango聽罷城城的「絕情宣言」後即淡然地說:「唔回應!」然後匆匆收線。

專案組