英皇老闆楊受成昨日借出淺水灣豪宅大花園舉行《英皇盛勢群星大合照暨孫楠加盟英皇記者會》，容祖兒、古巨基、Twins、黃耀明及泳兒等群星祝賀內地天王孫楠加盟英皇！近日盛傳將再做爸爸的謝霆鋒，昨晨由寧波返港，即撲返家換上白恤衫、牛仔褲、拖鞋及架上黑超出席盛會，當影大合照時他才趕到，企正老闆身邊兼中間位置的他兩度大叫「影完」急返入屋，要由經理人霍汶希（Mani）出手拉回原位！後來Mani叫泳兒「企埋啲」時，霆鋒摸摸下巴說：「我啲鬚根多唔多呀？」Mani號令眾星「笑多啲」，又開名叫霆鋒：「謝生，唔好陰笑呀！」場面搞笑！

期待再做爸爸

對於有傳老婆張栢芝懷有孖胎、早前刻意用手扯起上衫免被拍得大肚相，霆鋒默認將再做爸爸：「女性身體有變化係真，冇刻意去Check，冇醫生確認，加埋自己未肯定，所以唔講住！（怕小器？）唔係！（唔睇醫生？）冇刻意去Check Up，所以唔講得住，可以承認時會講！」他坦言期待做第二任爸爸，問到生完孖胎是否可以「收工」？他笑說：「佢（栢芝）話要5個，我話唔好，我要好靜！」問到栢芝是否不再接Job？霆鋒說：「暫時唔會喇！做媽咪啦！」記者表示等待他的喜訊，他即合十說：「Thank you！」

對於為何以「便服」造型出現？霆鋒說：「盡執o架喇！都係咁樣衰！」他更大方透露與英皇還有兩年合約，問到會否續約？他說：「呢個要問楊生，我唔識呢啲嘢，如果佢搵我傾先再傾啦！」

謝賢聞小器Cut線

霆鋒默認栢芝有喜，連他身邊知情人士都說：「栢芝係有咗，霆鋒今次好小心同口密，連助手、密友同經理人都冇講，原因係唔講得住！」不過記者致電向謝賢求證，他表現得相當厭煩：「你哋真係煩！（霆鋒默認喎？）真嘅我都唔知，未係呀！」問到是否怕小器？他即Cut線！至於栢芝經理人周小姐說：「冇聽聞，會唔會係霆鋒講笑？」而栢芝好友Eric Kwok前晚則說：「我有同阿仔（霆鋒）傾過，聽佢講老婆練緊琴，係咪有咗就唔知！（傳係龍鳳胎？）吓！龍鳳胎都知？栢芝都未知！女人有咗三、四個月會現形，反而霆鋒有大肚腩！」

文：音樂組　攝：吳文聰