熊黛林（Lynn）與王秀琳（Mango）兩位「攻城計」女主角，為「爭城」各出奇謀！早前Lynn牛一，特地飛赴泰國會城城72小時，返港後心情靚爆。當外界以為Mango已成「輸家」轉而夜會黃曉明時，她日前卻寸嘴搶攻，表示會約城城慶生。由於城城仍未肯對戀情表態，令富黛戀暗湧猶在！

前日城城44歲生日，Mango趁Lynn不在港即再出口術冧城。傍晚時分，她到時代廣場買衫，喪試吊帶低胸裙，又拉高短裙露玉腿，先後試了6套衫又揀帽，風騷非常！當她發現記者時更展露微笑，逗留約一小時後，她拿着大袋戰利品離開，問到送甚麼給城城？她說：「心意嚟啫！（約佢食飯？）我都約咗人。（約咗城城？）總之約咗人！」她隨即自爆有SMS祝城城生日快樂，更風騷地說：「佢即刻覆番我講多謝添！」

王秀琳搵「戰衣」時，亦揀選低胸款式，又露出玉腿，旁若無人。	Mango試衫期間不時講電話，未知是否Call城城呢？	放大圖片

壽星仔大晒禮物

至於壽星仔城城則飛起Lynn及Mango，相約好友及工作夥伴歡度生日。前晚約八時，城城笑容滿面到上環尚興潮州食店，記者祝他生日快樂，他即說多謝。出席者包括城城經理人小美、張叔平及排舞師好友Sunny Wong夫婦等，他們點了凍蟹、魚翅及響螺片，寓意城城名氣「響」噹噹！城城接過蛋糕及壽包時，許願希望身體健康及拍更多有質素的好電影。而他主演的《白銀帝國》導演姚樹華以電郵告知他，《白》片在夏威夷國際電影節獲最佳電影榮譽，喜上加喜。

城城留港歡度44歲生日，許願身體健康。	城城獲好友賀壽，更大晒生日禮物名錶。	放大圖片

至晚上約11時，Sunny夫婦先行離開，並表示送了香檳，但因城城昨日要開工，故只喝了少許。至12時許，眾人陸續離開，助手將大批禮物放到車內，城城更展示其中一件禮物手錶：「禮物唔一定要貴，最緊要同朋友聚埋一齊。（Lynn送咗咩？）唔講呢啲。」之後便登車返回寓所。

昨午城城搭飛機赴泰國繼續拍電影《B+偵探》，城城一臉風騷，問到生日是否過得開心及Lynn送了甚麼賀禮？他並無回應，只笑笑口入閘。