衞蘭（Janice）與文詠珊（Janice Man）同公司又同樣叫Janice（雙J），不過為食程度就好唔同！早排小小So去到一個演唱會慶功宴，肥嘟嘟嘅衞蘭，同冇丁點多餘肉嘅Janice Man咁啱同場，睇到衞蘭想食又不能食，相反Janice Man「唔多好食」就更加搞笑！
事緣餐枱放滿一碗碗熱湯，衞蘭望咗兩眼就忍唔住話：「咩嚟㗎？係唔係糖水？」飲緊湯嘅工作人員笑住答：「唔係呀！係湯嚟㗎！」衞蘭當堂失望到O嘴，但好快佢轉移目標到白灼蝦：「我好最鍾意食呢啲蝦㗎！」正當佢準備食指大動，助手就催佢走，跟住成枱人都叫佢食埋先走，衞蘭擰晒頭話趕時間，點知大家又再引佢：「打包啲蝦上車食囉！」衞蘭口水直流咁話：「我都想呀！」另一邊廂，瘦到得棚骨嘅Janice Man就啱啱相反，對比下更令人覺得衞蘭為食呢！