最近傅穎與金牌大風的合約糾紛鬧到滿城風雨，黃榕則宣布找到「錫晒佢」的經理人公司，更銳意向樂壇發展，有跳舞底子的她，更直言視台灣舞后蔡依林為奮鬥目標！
向來形象性感的黃榕（Gloria），終放棄「自由人」生活，找到信得過的經理人：「佢哋同我傾咗一、兩個月，公司好錫我、好遷就我，任得我揀自己鍾意做嘅嘢，佢哋知我最鍾意唱歌，所以幫我向歌唱嗰邊發展。」她透露計劃明年正式殺入樂壇，出唱片當歌手：「唔會趕及年底頒獎禮啦！依家我哋收緊歌，唔想咁趕！咁啱前幾日先有首歌，我覺得好有Feel，係首好慘情嘅慢歌，好似我以前嘅拍拖經驗。」問到喜歡跳舞的她為何不揀快歌？Gloria不諱言視蔡依林（Jolin）為目標：「其實我都想揀快歌，不過咁啱嗰首真係好鍾意，依家我知自己都未夠班好似Jolin咁啦！」
進軍台灣拍電影
至於形象方面，Gloria透露有意擺脫「性感女神」的感覺：「我嚟緊會轉型，試吓行型格路線。（告別性感？）我都仲會行性感，不過公司叫我唔好太過火，依家努力練歌先。」
除了積極為加入樂壇備戰，Gloria亦將於12月進軍台灣拍電影：「我早幾日仲去咗《72家租客》嘅Casting，角色係咩？總之唔係做狄娜啦！哈哈！」
Profile
姓名 ：黃榕（Gloria）
身高 ：160cm
體重 ：42kg
三圍 ：32C、23、33
出生日期 ：12月31日
演出經驗 ：前「高潮樂隊」成員、曾參與電影《九個女仔一隻鬼》及《百年好合》、多次擔任水着及內衣模特兒。
文：音樂組 攝：吳文聰