原本開懷的Ella突然沉默，她煞有介事地說：「一切好順利，反而令我有啲擔心，擔心幸福之中暗藏『殺機』，我怕會開心過龍，到時唔知點算！」得來不易的幸福，難免令Ella珍而重之，擔心在指間中溜走。
令父母安心
為「守得雲開」而興奮的人還有官媽媽，Ella說：「雖然父母從不反對我做歌手，但一直以來對我嘅報道都係性感或者緋聞，有時甚至係一啲炒作，試問有邊個父母睇到唔心痛？我知道媽媽好肉赤，但從來冇出聲，反而安慰我，叫我唔好放棄，全家人都會支持我！」她又感慨地說：「出面話我係有錢女唔憂做，其實係美麗嘅誤會，父母係唔使等我開飯，不過我要賺錢養自己，更希望可以養屋企，但入行至今我對個家都冇乜大貢獻，今日至少令父母安心！」原來Ella曾想過放棄，就連最好的朋友都跟她說：「唱乜鬼，賺唔到錢又冇人聽，不如轉行啦！」但Ella仍然堅持，她說：「好朋友咁講，只係唔想我浪費青春，並非要打擊我，但眼見老闆仍然肯畀錢，有人肯幫我出碟就唔好扭擰。後來諗通，唱歌娛唔到人咪自娛囉！我好享受！」
《超級巨聲》錄影前兩日，Ella到廣播道拍外景，工作人員正在舞台試音響，Ella竟跑上台自動請纓：「不如我幫你試咪吖！」然後她拿起咪用心地唱，一首又一首，當然包括「成名作」《Endless Love》，Ella說：「只要畀我攞住支咪，我就會畀心機唱，冇觀眾我都會繼續唱。」突然想起《喜劇之王》周星馳飾演的「茄喱啡」尹天仇，扮死屍都要有戲，導演未叫Cut就要演下去。
愛情大過錢
曾與吳卓羲傳緋聞的Ella當時絕口不提戀事，但最近卻大方公開與外籍醫生J先生相戀，連對待戀聞亦轉走「實力派」作風，她甜笑說：「我係正常女仔，有拖拍唔奇怪，佢好錫我，對我同家人都好好，冇必要隱瞞，對大家都公平啲！我唔介意佢係咪揸跑車，其實有冇車都冇所謂，要我揸車接佢都咁開心，我鍾意佢有才華、有智慧同善良。」
髮型：Kel Fung @ HH Hair.nail
服裝：Ted Baker
場地：The Quarterdeck Kowloon（海港城）