小小So係娛樂圈打滾多年，睇住唔少歌手出道、走紅，甚至結婚生仔，都好戥佢哋高興。早幾日小小So喺一個活動見到新婚嘅楊千嬅，即刻恭喜佢同丁子高，仲大讚佢容光煥發，千嬅聽到笑騎騎，跟住好有禮貌咁講多謝，臨走時仲主動同小小So講：「擺酒預埋你，一定要嚟呀！」小小So聽到覺得好安慰，至少千嬅都有小小So心。
小小So日前去電台「收料」咁啱再撞到千嬅，就問佢揀好出年擺酒嘅日子同場地未？佢話好頭痛：「要擺好多圍，唔係個個場都擺到。」提議佢不如擺幾日，佢即為記者心痛，仲話：「唔得，做死班記者，佢哋一定好辛苦。」千嬅搵場地擺喜酒都顧及傳媒辛唔辛苦，認真細心！