郭羨妮（Sonija）已有一段時間沒有拍拖，雖然缺乏愛情滋潤，但仍不愁寂寞，因為身邊有一班忠實粉絲，經常做些窩心事令她感動：「因為拍劇好忙，有時仲要出埠登台，所以較少時間同粉絲見面，佢哋為咗見我，有時會冒險去啲偏遠地方探班，令我好擔心！」有粉絲支持，難怪她不介意繼續做敗犬一族（意指年逾30歲的未婚女性）。

07年，Sonija與大班粉絲在快餐店開P，十分熱鬧。	郭羨妮玩遊戲之餘，更任粉絲影相，大家開心。	08年，Sonija與母親在餐廳慶祝，母女笑容一致。

收光碟感動到喊

為滿足粉絲，Sonija近年生日都與大家一起度過，今年尤其難忘：「班粉絲秘密搵咗一間樓上Cafe，到嗰日先通知我。我係7月生日，今年亦係我入行10周年紀念，我哋一齊玩遊戲，佢哋除咗送蛋糕之外，仲製作咗一隻光碟，裏面由我選港姐至拍過嘅劇集全部有齊，播嘅時候感動到想喊！」每年她都收到不少窩心禮物，當中一份特別有意義：「我成日叫佢哋唔好買貴嘢，嚟到已經好開心！有幾個粉絲自發以我名義捐錢畀香港兒童癌病基金，我覺得好有意義，間接做咗善事！」

Sonija自言已視粉絲為一家人，還承諾將來結婚一定會告訴他們：「佢哋好多都祝我快啲搵到如意郎君！將來拍拖，如果感情未穩當然唔會公開，但如果真係嫁得出，我亦唔介意同粉絲分享喜悅！」

文：專案組