傅穎（Theresa）與金牌大風仍有合約糾纏，前日她正式簽約星皓，但金牌則發聲明力指Theresa的舊約是金牌大風與TalentBang共同擁有，需待兩間公司同時接納才能解約。

昨日Theresa首以星皓藝人身份出席活動，星皓更派出藝人部董事總經理彭淑霞及兩名工作人員護航。有備而來的Theresa甫見傳媒即多謝大家包容及金牌大風7年來的栽培，對於合約問題，她說：「大約上個月金牌大風主動公開話無條件解約，我諮詢過律師，只要我畀封律師信金牌大風表示接受Offer，就可以正式解約，依家簽咗新公司會幫我發展未來事業，同時亦希望舊公司順利！」她更胸有成竹地說：「相信已有法律效用、已正式解約，至於舊公司合約係點？會交畀律師處理。」

堅稱冇6位數收入

對於陳輝虹指她在金牌大風期間每月收入逾6位數，Theresa反駁說：「唔係事實，有需要我可以攞證據出嚟，不過依家唔方便講，會交畀律師處理！」問到若果打官司會否交由星皓處理，她說：「如果自己解決到會自己解決！」身旁的彭淑霞表示不清楚Theresa與舊公司的事，現在只會處理Theresa的未來發展。對於金牌大風指其舊約仍有一段時間及有沒有違約等問題，她表示會全數交由律師處理，而她只會跟律師意見辦事。問到金牌大風是否已回覆，她說：「一切交由律師處理！」

寸藐視合約精神

不過金牌大風對Theresa仍咬住唔放，陳輝虹寸爆她說：「係佢單方面解約，我好詫異，我強調佢同金牌大風同TalentBang嘅合約仍然生效，佢以為出律師信畀兩間公司就可以解約，呢個世界太兒戲！」問到會否告她違約，他說：「違約同重婚冇分別，請傅小姐尊重法律，公司會採取法律行動！佢嚴重違約，賠唔賠要開完會先傾，冇可能藐視合約精神，解約都要有解約書，冇理由出張律師信就當解約！一定採取法律行動，最快聽（今）日發律師信畀佢！」對於曾公開表示會放生Theresa，陳輝虹表示明日與TalentBang開會商討。

或構成違約

Theresa簽約新公司星皓，雖表示已與金牌大風解約，但金牌大風指她仍有合約，對此律師梁永鏗說：「一方公司口頭上話無條件放人，但唔清楚佢哋細節上有冇傾清楚，如果藝人合約係由兩間公司共同擁有，其中一方話放人都唔得！要兩間公司一齊同意，白紙黑字先可以正式解約，所以藝人簽約新公司係會構成違約！」