李司棋（荷媽）喺電視圈地位甚高，又以待人親切見稱，所以有唔少藝人同傳媒朋友都好尊敬佢，但原來佢唔只對人親切，連對小動物都好到不得了，非常有愛心！
早排司棋姐同小小So講開啲狗仔，佢話有次坐緊朋友車，見到路邊有一隻狗畀欄杆夾住咗下半身，當時有個男人嘗試拉隻狗出嚟，但唔成功，隻狗仔受驚不斷掙扎，司棋姐見到咁嘅情況即刻落車幫手，好細心咁安撫隻狗仔，氹咗一陣先好小心咁拉佢出嚟，終於成功將佢救出，仲送咗去愛護動物協會添！
其實司棋姐同啲狗仔都幾有緣，小小So知道喺新劇入面佢要同一隻小狗做對手戲，早排佢請一班同劇演員食飯時，小狗都有現身，一見到司棋姐仲鬼咁開心主動「嗲」佢，足證司棋姐魅力十足呀！
