成日畀人話有公主病嘅諸葛梓岐（Marie），其實份人好鬼Nice，佢唯一似公主嘅地方，就係份人夠晒嬌嗲，而且佢嘅「嗲功」唔單止限於男士，佢連女士都願意「慷慨解囊」！唔怪之得Marie喺熱捧嬌嗲女星嘅日本市場度，可以同走Kawaii路線嘅Angelababy鬥個你死我活啦！
話說有日小小So同Marie傾緊閒偈，席間佢個手提電話不停係咁響，為咗唔想打斷同小小So嘅話題，Marie初時都唔係好敢聽個電話。但因為個電話係咁響，Marie惟有好唔好意思咁同小小So Say Sorry，之後就用好溫柔嘅語氣聽電話，以下係Marie嘅談話內容節錄。
Marie：哎吔，唔好意思！我有其他嘢做緊……（以極可憐嘅語氣同眼神）可唔可以改期呀？（嗲聲嗲氣）不如星期三呀？吓？星期三你唔得呀？咁不如星期二呀？都唔得呀……星期四、星期五、星期六呀？（加送蠟筆小生的亮晶晶哀求眼神）你邊日得閒我都可以就你㗎！
見Marie講個電話都咁肉緊，小小So就八卦問講緊電話嗰個係咪佢男友啦？點知Marie話係整指甲嘅姐姐喎！嘩！連用電話同整指甲嘅姐姐Book Appointment都照樣落足「電力」，唔怪之得Marie咁得男士歡心啦！