吳彥祖雖然緋聞多多，但完全冇影響佢同女友Lisa S.嘅感情。除咗佢哋性格投契外，相信Lisa嘅可愛性格亦係原因之一。話說有日小小So無意間撞到Lisa，當時佢傾緊電話。為咗唔好要人呆悶，Lisa邊傾邊做出起碼接近二十個古靈精怪嘅表情，真係好鬼有心。不過，Lisa對好姊妹Ana R.就更加體貼，事緣有日Lisa同Ana R.前後腳出席某個活動，撞正有Fans影相。Lisa知道Ana從來唔多化妝，為免對方嘅真面目畀Fans一覽無遺，Lisa急急腳打畀遲嚟嘅Ana「提水」。
Lisa：喂，你今日有冇化妝？
Ana：冇呀！
Lisa：咁唔得喎！呢度有Fans影相！唔係喇！我有副太陽眼鏡喺度，你依家去到邊？我即刻拎副太陽眼鏡畀你頂住先，等你唔使畀人影到素顏樣。
睇見Lisa個樣鬼死咁着急，就知道佢幾咁重視Ana！正所謂「你對人好，人對你好」Lisa咁為得朋友，唔怪得吳彥祖咁鬼冧佢！