明日是中秋佳節，身在台灣宣傳的Eason提早與歌迷燒烤慶祝，與五名幸運被選中的歌迷打成一片。Eason充當大廚負責燒肉串讓歌迷品嘗，烹調時不停擺出鬼馬表情，期間有女歌迷要求Eason：「我要你餵我食！」他立即答應，但被對方突然摸腰的舉動嚇窒，女歌迷解釋只想示意Eason望鏡頭，笑爆全場！

陳奕迅為歌迷下廚，不時整蠱作怪。

陳奕迅遭女歌迷「突擊」攬腰，嚇得即時彈開。

趕返港過中秋

Eason在港、台均沒有歌迷會，平日也甚少跟歌迷聚會，他坦言最怕歌迷「擒星」，貼身追查其行蹤：「不過今日玩得好開心，我都好鍾意同歌迷聚會。」他還透露將趕返港與家人共度中秋，人月兩團圓，問到可有為女兒準備燈籠？Eason說：「呢啲交畀佢媽咪處理。」

另外，對於張學友自爆女兒不准他在家中練歌及批評他的歌聲，Eason笑說：「我冇喺屋企練歌，阿女都冇批評我唱歌，但讚我靚仔！不過佢好難捉摸，一時話我靚，一時又話我醜，又叫我同阿徐做『FatFat』，將來佢大個啲男人有難！」記者笑指康堤的異性緣比他好，Eason即笑說：「我異性緣、同性緣都非常好。」

文：音樂組 攝：司徒國榮台灣傳真