周秀娜（Chrissie）憑噴血寫真和攬枕等上位，獲科技大學理學院邀請出席下周三的「解讀周秀娜現象」講座，科大方面表示希望由學術角度出發，解讀o靚模文化及消費現象。

但查小欣昨日在其電台節目中力斥：「幾膚淺、咁低落！周秀娜成功？佢係出位，叫啲學生仲使唔使讀書，不如退學喇！如果我喺科大讀緊，咁辛苦讀入嚟，要我跟o靚模學習？不如改名叫『化學大學』！講座主題係『知識無限』，應該改寫成『姿色』，世上咁多知識，使乜要將學術娛樂化？培養宅男？前科大校長一離任，科大冇晒品味，將啲出席講座嘅高官同學者拉低埋，希望其他大學唔好有樣學樣。」

科大辯稱非博宣傳

而名模莊思敏亦大感愕然：「吓？自己講自己好奇怪，解構外星人都唔會搵外星人自己講番。（搵名模講？）應該搵傳媒同市民講，呢個文化係佢哋夾手夾腳做出嚟。」周秀娜經理人Roy則說：「題目唔係我哋起o架！我哋係獲邀出席咋！大家可唔可以唔好咁主觀，（點睇查小欣言論？）No Comment，不如聽完個講座至講喇！」

科大理學院副院長吳大琪指o靚模已成為社會現象，院方藉此讓學生分析，從而得出個人意見，絕非博宣傳。教育界立法會議員張文光則認為，大學邀請講座嘉賓需審慎處理，避免有學生為湊熱鬧多於學術文化研究：「搵o靚模做講座，有幾多學術嘢可以講到？」

文：影視組