與金牌大風關係決裂的傅穎(Theresa),與楊愛瑾(Miki)等昨晚齊齊出席關注乳癌活動時高調宣布,已向金牌大風發律師信要求解約,並句句有骨寸爆公司,更直認「唔開心」及「一個人承擔壓力好大」,對現狀極為不滿。另一邊廂的金牌大風CEO陳輝虹亦對Theresa發律師信感詫異,反罵對方有意搞作新聞兼多此一舉,隔空爆發罵戰。
記者:記 傅穎:傅
傅:我今日正式畀信金牌大風要求解約。之前陳輝虹都有講過解約嘅事,公司要公開,我都要公開,今日嗰封係正式律師信。
記:仲有幾耐合約?
傅:仲有一段日子,但幾耐就唔方便講,我好多謝公司講過無條件同我解約。(覺得解脫定唔開心?)每個人經歷呢啲嘢都會唔開心。(掙扎過?)都好一段日子。
記:公司唔肯放資源喺你身上?
傅:好多謝公司呢七年嚟嘅栽培,令我學識好多嘢,成長咗好多。(同公司不歡而散?)依家我等緊公司回覆。(意興闌珊?)大家都有共識。(同鄭中基唔啱?)成件事交咗畀律師處理,唔可以交代咁多。(同鄭中基唔啱?)同佢合作過電影,大家合作愉快。(係咪朋友?)我好少去聚會,放咗工之後我會返屋企。(埋唔到堆?)識我嘅人都知,每個人性格唔同。
拒講經濟問題
記:依家係咪無業?
傅:有好多嘢仲係傾緊嘅階段。(有冇同鄧麗欣講過?)唔講呢啲,身邊嘅朋友都知道我嘅決定。(今次係挫折?)我會自己承擔,雖然承擔壓力好大,但係一個磨練。
記:今次解約關鄧麗欣、鄭中基同方力申事?
傅:呢啲唔講。(Cookies散晒?)一定有機會再碰面,呢個世界係圓嘅。(覺得前路茫茫?)做呢個決定我唔想諗其他嘢。
記:有冇經濟困難?
傅:……
記:傳吳雨霏都話走,你同佢有冇共識?
傅:我冇查證過,如果佢開心,我都會支持。
Theresa還表示就解約一事已致電恩師黃栢高,承諾對方會宣傳早前替公司拍下的電影。
明斥新聞炒作
對於Theresa盡爆解約內情及發律師信要求解約,金牌大風CEO陳輝虹直言感到詫異,並表示已收到的律師信只是傳真版本,暗寸有人「臨急臨忙」,他說:「我嘅感覺係點解又要咁?我哋已經願意解約,冇任何阻撓,唔明點解佢要發律師信。除咗做新聞搞作同佔據篇幅外,諗唔到第二個理由。我覺得呢封律師信根本唔成立,嗰份合約係佢自己親手簽!發律師信都要成本,多此一舉!係咪Talent Bang有問題?如果係咪發信畀佢哋囉!(公司點處理?)交畀律師處理,我哋依然唔使佢賠錢。」
至於與金牌大風共同擁有Theresa經理人合約的Talent Bang,其副總裁Tony竟表示對解約一事並不知情,不知是否有收到律師信:「我唔喺香港,要返嚟先處理。(簽埋佢?)遲啲開會傾。」