早排吳嘉龍（Carl）行騷，小小So都有去睇，佢話自己最鍾意着恤衫，因為女友鍾意佢着，覺得Man啲喎！就快中秋節，呢個人月兩團圓嘅節日，當然要同Honey過啦！
不過，Carl就有兩個Honey，唔好誤會佢劈腿，其實一個係佢女友Leah，一個係佢老竇。Carl話會先同韓國女友Leah返去韓國老家過節，原來佢女友嘅細佬Myk係歌手，仲成立咗組合Epik High，Carl話：「Myk識得唱歌、作曲同打鼓，好有才華，之前喺洛杉磯同紐約唱歌。」陪女友去完韓國，佢就會陪老竇吳耀漢去曼谷睇影展，佢話自己唔係有咩戲參加影展，只係純粹陪老竇啫！果然係孝順嘅廿四孝男友！
