外表溫柔的唐寧，原來是男仔頭，除了向化妝品Say No外，更不介意着鞋唔着襪兼唔沖涼瞓覺！
習慣篇：環保舊睡衣
問：點睇着鞋唔着襪？
答：快！我開車都經常唔着襪o架！
問：試過攰到唔沖涼就瞓覺？
答：試過！有次開完幾日工，一入門口就瞓着咗喇！
問：鍾意着便服、公仔睡衣定性感睡衣瞓覺？
答：便服，最舊嗰啲，因為環保嘛！
解碼： 「雖然我做幕前，不過我一啲都唔貪靚，成日畀經理人話我求其！其實瞓覺衫使乜咁講究，又冇人睇！不過我要澄清，我份人只係求其，絕對唔係污糟！」
童年篇：寫信給家駒
問：有冇玩過Barbie或煮飯仔遊戲？
答：以前有玩過Jenny，不過玩咗一個星期左右就冇玩，因為好無聊！
問：寫信畀明星呢？
答：有，黃家駒過身後，寫過封信畀佢，一來同佢合作過，二來當時真係好掛住佢！
解碼： 「我都唔明點解當年會玩Jenny，啲咁女仔嘅公仔，真係太唔適合我，諗起都毛管戙！至於點解玩Jenny而唔玩Barbie？我估係因為鋤強扶弱啩？哈哈！」
收藏篇：成屋Keroro
問：鍾唔鍾意收集鞋、錶、公仔同袋？
答：最鍾意收集Keroro軍曹公仔，多到數唔到！
問：最唔鍾意身體邊部分？
答：唔鍾意自己多毛，好煩！
解碼： 「我真係好多毛o架！好多大家想像唔到嘅地方都有毛，你知做藝人成日要着短裙同短袖衫，多毛真係好唔方便！」
飲食篇：最愛食生果
問：食唔食得辣嘢？
答：唔食得辣，但勁鍾意飲冬蔭功！
問：有咩古怪嘅飲食習慣？
答：飯前飯後都會飲湯同食生果。
解碼： 「無論湯同生果，我都係想飲就飲、想食就食㗎喇！我唔怕食得多會肚痛，因為呢啲嘢有益！冇益但好味嘅我都會食，但就食少啲囉！」
文：專案組 攝：吳文聰