謝婷婷與安志杰公開戀情後，人前人後晒恩愛。婷婷昨日出席Laneige活動時自爆也有嬌嗲一面，就是在枕邊向男友講甜言蜜語，問到會否每日向男友說「我愛你」，她說：「都會㗎！（男友有冇做啲嘢令你好感動？）有時我做完嘢返屋企，佢買束花送畀我，我已經好開心！有時佢坐喺度好專注咁打機，但當我有少少郁動，佢會即時問我有咩需要幫手。」如此細心，難怪兩人感情與日俱增！

冇打算同居

安志杰現正在內地工作，婷婷表示不用做甚麼維繫感情：「唔使特別擔心，大家好好關係，我只要求佢有乜事要同我講，大家一齊分享。（諗過同居？）暫時唔會，依家都冇乜分別，有時佢嚟我屋企，有時我去佢屋企！」早前有傳婷婷簽約王晶，問到是否已成事？她說：「仲未落實，唔講得！我諗今個月底或下個月頭先講，我都好心急。」

同場的鄧紫棋（G.E.M.）自言會帶驚喜給男友，試過以雪條棒自製一個摩天輪音樂盒氹男友，問到為何分手？她說：「當時我考會考，佢就考A-Level，大家都好忙咪分開。」單身的她揚言恨拍拖，問到曾傳緋聞的陳偉霆可有機會？她說：「一定唔會，佢成日話我肥！全世界都可以話我肥，但男友就唔得！」

文：名人組