官恩娜（Ella）早前揚威《超級巨聲》，令全港驚覺其震撼靚聲，更令她熱爆網上討論區，獲不少網友力撐。Ella透露會挾威勢赴日發展，大唱其拿手英文歌，同時經王友良介紹認識當地著名Rapper日華，兩人在新歌中有合作機會，新歌MV亦會在日本取景，更有可能推出寫真，不讓一眾o靚模專美。

Ella直言歌藝被認同後工作量增加，她說：「多咗工作搵我，至於加唔加價留番畀公司決定，我冇意見，對我嚟講多咗人留意我嘅工作已經好滿足。」不少網民均認為Ella出道多年仍沒有好發展，呼籲她轉公司，對此Ella說：「我飲水思源㗎！咁多年公司都冇放棄過我，仲幫我出碟，我已經好滿意，努力咗咁多年終於有人留意到好感動，梗係唔會走啦！同埋我都好多謝電視台畀呢個機會我，更加多謝雷頌德，佢嘅鼓勵對我好重要，當晚離開電視台都仲眼濕濕。」

男友請食火鍋慶祝

赴日在即，患有哮喘的Ella表示最近天氣變，故最重要保養好身體，而其男友亦十分識做，提議請她食最愛的芝士火鍋慶祝，Ella說：「可惜我減緊肥，惟有拒絕，但我當自己食咗啦！」

雷頌德估唔到回響大

於節目中大讚官恩娜唱歌好聽的雷頌德表示，沒有預料自己幾句讚美說話會有如此大的動力：「我不嬲有嗰句講嗰句，但都好替佢開心，咁都幫到佢，當時真係覺得佢唱得好好，可以駕馭到首歌，我聽到好意外，冇預料會咁好，聽得出佢唱歌下過苦功。不過，我只係聽佢唱過呢首歌，唔等於其他歌都好，但嗰晚佢真係唱得十分好，唔係求其了事。」

文：影視組