同人唔同命！正當Theresa前路茫茫之際，當年同期簽金牌的吳雨霏（Kary），對於有傳Theresa離開，她昨日出席活動時說：「我冇聽過，我知佢今日生日，有SMS畀佢，因為呢排工作好忙，有一排冇見，亦好少講電話，如果見到會問番！（離巢會否祝福佢？）希望佢開心！Cookies到依家都咁耐，預咗大家會各自發展，最重要搵啱路！」
Kary表示將於年底約滿，雙方已開始傾續約，問到要求甚麼條件？她說：「我唔會講太多，自己係金牌人，一直唔會講錢，係講心，對金牌好有信心！（最希望要咩？）我最想出國語碟，呢方面對公司都有信心，希望下年做到！」
