昔日嘅o靚模文詠珊（Janice Man），獲黎明（Leon）招攬後，搖身一變升呢成為Leon嘅「模Art」新寵，出席各大小活動都有助手傍住，一個唔夠畀夠兩個，得寵程度可想而知！話說Janice之前獨挑大樑幫客戶宣傳，得到兩個同事貼身照顧，連去洗手間都有專人護駕，咁啱小小So喺洗手間同Janice相遇，第一句就聽到佢講：「好臭呀！」不過，原來佢唔係「方便」緊，而係為活動前作最後檢閱，忍住臭極速睇清楚髮型、化妝同衣衫係咪執正晒先出場。
出場後，Janice一個人對住十幾個鏡頭，望完左邊望右邊，重複又重複，笑得好不燦爛，不過當有記者叫佢望左邊，佢竟然話：「望咗喇！」雖然語氣唔算重，但撈得呢一行就要面面俱圓，咁講嘢好易畀人扣分㗎！之後Janice仲當住記者面前「抽」起條Tube Dress，嚇到佢身邊嘅助手即刻出手提番佢！咁又係嘅，檢閱「裝」容咁小兒科都喺洗手間做，咁「抽」起條裙就更加要啦！