15/09/2009

播放本新聞相關短片

周柏豪想食雪糕變怕醜仔

小小So日前去咗電台探班主持老友,仲特登買咗幾杯雪糕諗住過吓口癮,點知咁啱撞到近日畀傳媒踢爆同模特兒「翻版徐子淇」鍾浠文搭上嘅周柏豪,雖然小小So喺娛圈打滾好多年,但同新一輩歌手都有傾有講,柏豪見到小小So即好有禮貌咁點頭兼Say Hello。

小小So笑佢有拖拍果然唔同啲,成個人都容光煥發,怕醜仔柏豪即面紅耳熱,仲好抵死叫小小So放過佢。小小So見佢咁可憐,加上知佢鍾意食甜嘢,所以順口問佢食唔食雪糕,佢耍手擰頭一副唔好意思樣,佢話:「唔好啦!怕你唔夠分。」小小So二話不說塞咗杯雪糕畀佢,接過手嘅柏豪不停講多謝!

其實,小小So睇住唔少新人出道,亦見過好多未紅先驕兼冇禮貌嘅新人,最慘佢哋以為自己好紅,唔需要聽任何人講,鍾意做咩就做咩,以為咁就叫有性格,希望呢班唔聽話嘅藝人,好好向呢位新人周柏豪學習咩叫「禮貌」同「尊重」。