本文重點
周家蔚即將出書,帶大家在歐洲捐窿捐罅,搜尋地道特色美食。
文:影視組 攝:倪立煌
周家蔚擁有一身健康膚色,原來她過往是沙灘常客,但近年已絕迹沙灘,她說:「入行前,每逢夏天都經常同朋友去沙灘游水、曬太陽,最瘋狂嘅時候,一星期可以有五日喺沙灘,所以曬到好黑。不過入行之後,已經兩年冇去喇!最近一次同朋友去,畀狗仔隊影咗相,之後就冇再去喇!依家偶然都會同朋友出海曬太陽、游水。」問到曾否被「好色男」調戲?她說:「咁又冇咁大膽,最多都係眼甘甘望實囉!有啲男仔好好笑,扮到唔係望你,但實際上又睇住你,你行到邊,佢嘅視線就跟到邊。」
打探地道餐廳
沙灘為周家蔚帶來不少回憶,她說:「細個媽咪經常帶我去沙灘玩,媽咪好鍾意游水,屋企有好多佢着泳衣擺甫士嘅相。」下月,她將往倫敦及巴黎拍攝旅遊指南,故已四出向朋友打探地道餐廳:「我問定倫敦同巴黎嘅朋友,佢哋介紹咗唔少只有當地人識去嘅地方畀我,到時可以加入本書度。」
跟明星遊天下
港人愈來愈喜愛自由行,市面上的旅遊書多不勝數,為求突圍,出版社興起與藝人合作,由明星帶隊介紹購物點及名勝等作招徠。今年推出的明星旅遊書包括周麗淇介紹日本東北風情的《幸福》,銷量甚佳;同期還有吳日言介紹沖繩吃喝玩樂點的旅遊書,反應亦相當不俗!
姓名:周家蔚(Janet )
身高:167cm
體重:46kg
生日:8月25日
獎項:《2006年香港小姐》亞軍及最上鏡小姐