甄穎珊（Carisa）兩位好姊妹石詠莉同陳樂榣，出咗名言論大膽，但咪睇Carisa平日驚驚青青，其實佢都好大膽，連小小So聽完都嚇傻！原來佢細個住開平，媽咪仲係廚師，一聽就知成日有好嘢食，所以次次開飯都係「碟碟清」，佢仲話媽媽嘅獨門絕技就係家鄉鹹湯圓。
Carisa ：雖然鹹湯圓個名好怪，但係真係好好食！
小小So ：媽咪係大廚，你有咩拿手菜？
Carisa ：獨門秘方就冇，不過有樣「家鄉」嘢，唔係人人夠膽食！
小小So ：到底係咩咁巴閉？
Carisa ：咪就係水曱甴（和味龍）啦！
小小So ：吓！個樣咁核突都夠膽食？
Carisa ：好好食㗎！啲水曱甴上碟死咗，「搣」咗個頭同翼，再拉條腸出嚟就食得！
小小So ：聽到都心寒，難為你仲講到咁滋味！
Carisa ：鄉下個個都食咪唔會驚囉！