模特兒Cara G.嚟香港發展咗一段時間，成績都唔錯，而且又有個愛錫佢嘅男朋友，真係羨煞旁人。早前小小So喺一個活動見到佢，覺得佢真係唔錯，又真又健談。
小小So問佢平時鍾意做乜，原來Cara好鍾意唱K，但喺香港就甚少唱，喺外國反而一有時間就同屋企人或三五知己大唱特唱！小小So好奇究竟喺外國唱K同香港有咩唔同？
佢話：「香港同澳洲嘅K場有好大分別，外國好多時都會喺大廳唱，唔會好似香港咁得一間好細嘅房，好多人逼入去。我要對住好多人唱，雖然會好怕醜，但個個都係咁就冇所謂，最緊要開心！」
Cara又話雖然喺香港已經一段時間，但依然完全唔識廣東歌同國語歌，所以好少唱K，就算唱都係唱英文歌，問到鍾意唱咩歌，佢話：「都係一啲Pop Song、Rock Song，我係乜都唱嘅人！」問到最鍾意邊個歌手，佢就話：「Jose Gonzalez！佢啲歌好好聽，亦好易聽！」