初為人母的陳慧琳，十分緊張金叵羅愛兒劉昇（Chace），上周復工提起要離開心肝椗一日，她因為不捨而立即眼濕濕！昨日Kelly與李克勤綵排《星光熠熠耀保良》，雖然她獲金至尊送上牛仔形兼有Chace名字的鑽石鏈，不過一提起囝囝打針，火速觸動她的緊張神經，變身緊張媽咪，將天后的高貴形象拋諸腦後！

產後兩個月已收身的Kelly，昨日穿上喇叭牛仔褲襯外套，她透露前日首次帶Chace打肺炎鏈球菌及六合一的預防針，她睩大雙眼又皺眉說：「我當時好騰、好驚，打落去時我好心痛呀！囝囝『呀』一聲嗌出嚟，谷到塊面紅晒，然後停咗幾秒先再喊。」她一副打在兒身、痛在母心的狀況，將這位以靚行先的潮媽肉緊之情表露無遺！

問到可擔心早前本港有預防針過期？原來Kelly早已作好準備：「唔驚！我去私家醫生打，好Pro（專業）嘅！姑娘已減少佢痛楚，左右髀兩支針一齊打！（BB喊，你有冇跟住喊？）冇！不過有少少心痛！」她更表示Chace出現發燒徵狀，令她整晚不能入眠：「係㗎！成晚冇得瞓，每隔兩個鐘就起身探熱，仲買咗兩支探熱針一齊探！」如此設想周到，令人羨慕！

隨身帶相慰單思

雖然已極速收身，但Kelly仍未滿意，還需減多8磅贅肉，目前每日做一小時瑜伽，但因要餵人奶而未能節食：「我唔可以做太劇烈嘅運動，加上餵人奶要食番多啲嘢，如果唔係就唔夠奶！」為解「單思」之苦，她更每日帶備Chace的相片出街：「掛住？OK啦！我日日都有幫佢影相，整咗好多本相簿！」久未演出的她，今晚將與克勤合唱多首金曲：「對上一次上台已經係2月，做阿倫（譚詠麟）同克勤嘅演唱會嘉賓，今次又係克勤，真係好有緣！」