習慣題：

問：會唔會攰到唔沖涼就瞓覺？嗰次係點？

答：平時點攰都會堅持沖涼，不過試過因為開工搞到4日3夜冇得瞓，連屋企都返唔到！好彩嗰時冬天，惟有一有Break就匿埋抹身，同狂換內衣褲保持清潔囉！

解碼：Pinky幾忙都不忘清潔洗白白，個人衞生做到足，可能有潔癖呢！

瘀事題：

問：如果喺電梯度放屁，個個都懷疑你，你會有咩反應？

答：梗係屈咗身邊人先啦！講真，我真係可以忍住唔放屁，20幾歲前一次都未試過！點知有朋友話我咁忍法，對身體唔好，我先意識到，所以都算「奇人奇技」！

解碼：一般女士都不肯講屎尿屁，難得Pinky暢所欲言，這個烈女坦白又可愛！

貼身題：

問：鍾意着T-back、高腰定低腰內褲？

答：平時喺屋企自己一個嘅話，我最鍾意着孖煙囪，私人珍藏咗3條Calvin Klein，質料勁舒服，呢個算係我一個小小嘅秘密！

解碼：男士愛着孖煙囪貪通爽，男仔頭的Pinky，看來都愛自由無束縛！

童年題：

問：有冇同男仔打過交？

答：有呀！記得13歲左右，有次同朋友去泳池游水，有個男仔蝦我個同學，好似想博佢懵！我最憎人恰我啲朋友，所以咪係咁追住個男仔打，佢都嚇到冇我辦法，不過事後我都擦損晒啲手手腳腳！

解碼：Pinky愛打抱不平，曾出手為好友解圍，算是女中豪傑！

死穴題：

問：見到曱甴會有咩反應？

答：嘩！不得了！有次有隻曱甴飛咗入屋，當時得我一個人喺屋企，驚到抱埋隻狗逃亡，去咗朋友度借宿一宵！第二日仲叫人上門幫我捉咗隻曱甴先，否則我死都唔肯返屋企！

解碼：身為女中豪傑的Pinky，原來都有不少死穴，渴求男士保護！