郭富城與熊黛林（Lynn）的緋聞傳足三年，女友地位一直未獲承認，早前城城更被發現偷會王秀琳（Mango），有消息指事件令Lynn逼男友公開名分，卻反效果地令城城毅然斬纜。

城城前晚出席《FASHION MOMENT》09秋冬時裝及攝影匯展，不單以仙女論講明自己未找到理想對象，似乎與Lynn劃清界線，還不怕惹緋聞，大讚同場世界小姐張梓琳及台灣性感女星楊謹華各有美態：「兩個都靚，男仔比較貪心，最好集合所有優點，好似仙女下凡冇瑕疵。（你搵到自己嘅仙女未？）搵緊，慢慢。」問到Lynn是否未符合要求，他坦言除非找到結婚伴侶，否則日後不再談私事：「私人嘢以後都唔會講，冇必要公開，如果有一日郭富城結婚都係喜事，搵到另一半去組織家庭一定會公開。」莫非真的與Lynn分手，所以不擔心有人呷醋，公然睇女？

Lynn行街冇心機

另一邊廂「天王嫂」地位驟得驟失的Lynn，心情跌落谷底，日前與友人在中環行街，全程沒精打采頭耷耷冇心機，及後記者上前拍照，一向任影唔嬲的她，罕有地擰歪面避鏡頭，然後急步離開。

同場的Mandy Lieu則透露與男友陳柏霖未開始計劃結婚，而麥浚龍表示欲請家人旅遊，但沒打算邀緋聞女友鍾欣桐同行。