梁安琪同曾航生拍拖多年，依然恩愛如昔，早前曾航生「牛一」，女友專誠訂咗間餐廳，為男友舉行生日派對，仲Call齊好友同傳媒到場。當日小小So一早去到餐廳，曾航生同梁安琪都準時現身，不過其他賓客仲未到場。為咗招呼傳媒，佢哋先接受訪問，身為女主人嘅梁安琪仲好熱情咁送禮物畀小小So，小小So婉拒佢嘅好意，但佢堅持要小小So收下！
梁安琪 ：今日為咗多謝你哋嚟，我準備咗啲女士髮夾送畀大家，小小心意，你可以隨便揀！
小小So ：唔使咁客氣喇！留番送畀其他賓客啦！
梁安琪 ：唔好啦！你一定要揀一個，我準備咗好多呀！
小小So ：真係唔使呢……
梁安琪 ：呢啲係我嘅小小心意，你收咗佢啦！個個都好靚㗎！
小小So見梁安琪咁堅持，最後揀咗一個髮夾，想離開之際，佢再邀請小小So留低食飯，小小So惟有以有工作在身而婉拒，實在唔好意思又食又拎！