去年有張舒雅締造「最Hea港姐」傳奇，今年則有「女版許愿」林潔瑜（瑜瑜）創造「最搏殺港姐」神話！雖然瑜瑜在比賽中「大熱倒灶」捧蛋，不過向來拚搏的她對娛樂圈的熱誠未有因此減退，相反繼續出盡法寶，務求在一眾落選及三甲港姐中突圍而出！

人氣持續高企的瑜瑜，除了繼續發力在港姐官方網站撰寫個人網誌訴心聲外，還換上新Look，成功再以奇招贏盡焦點！昨日她與應屆港姐冠軍劉倩婷、亞軍李姿敏及季軍熊穎詩等，錄影J2節目《My Name Is邦》，她剪了短髮配上紳士帽及西裝褸，作中性打扮，由「女版許愿」升呢變為「複製許愿」，像真程度令人咋舌！問到成功轉「形」會否擔心被冠以「複製許愿」外號？EQ爆棚的她淡定地回應：「剪咗短髮驚唔驚仲似許愿？唔驚！冇乜嘢需要驚，驚唔驚畀人話都唔重要，好早已經覺得唔重要。」EQ與IQ兼備的瑜瑜更即時轉換話題，自爆早前發高燒入院留醫，成功轉移記者視線：「好彩診斷之後，證實唔係豬流感（H1N1甲型流感）。」

賣口乖恨簽無綫

有心在娛樂圈闖天下的瑜瑜賣口乖表示，若將來簽約成為藝人，一定會優先考慮無綫，塑造「飲水思源」形象為自己加分：「我仲等緊通知，都有其他公司搵我做訪問同拍廣告，不過會以TVB優先。」

劉倩婷爆情史反擊

至於風頭被搶的劉倩婷，則出招向瑜瑜反擊，自爆錄影時被主持崔建邦逼供：「佢問咗我幾次係咪斷背，我話唔係。（尷尬？）係意料中事，佢仲追問我有冇拍過拖，我以前係有拍拖，但係依家冇，佢係異性外籍人士，後來因為我要返嚟香港，所以冇一齊。」她更揚言不介意與黑人談戀愛，出位程度直逼瑜瑜：「緣分啱、夾得嚟冇所謂。」而李姿敏與熊穎詩則異口同聲表示，遭崔建邦追問戀事，不過二人暫時沒有拍拖。