06/09/2009

播放本新聞相關短片

洪卓立詩雅陳家樂品味愛情

愛情就像一道Fusion菜,甜的、苦的、鹹鹹的……「他」會令你會心微笑,而「她」也許很「茶煲」,但那青澀的味道絕對一試難忘!洪卓立、陳家樂與詩雅雖沒有一本米芝蓮戀愛大全,要在跌碰中尋找愛情的烏托邦,但他們有燃燒不盡的青春,只要能和你在一起,即使吃一口孔雀石綠又如何?

人是感情動物,少了愛情,人生就像缺少甚麼。愛情可以是美好的回憶,也可能是痛苦,男生與女生的愛情觀很不同,拍過3次拖的洪卓立及陳家樂,與詩雅同樣愛得戰戰兢兢。

洪:洪卓立 陳:陳家樂 詩:詩雅

詩:我覺得愛情好似一道甜品,可以調劑生活,每個人都需要。我拍拖嗰陣會肥,好似食得甜品多咁,但肥得好開心,我依家都想肥吓!

洪:記得初戀發生喺16歲,當初都係抱「人有我有」心態。

陳:我都係呀!我覺得男仔喺讀書時期,鍾意打機多過想有女朋友,所以唔係好認真。

洪:就係因為細個唔識同女朋友相處,結果搞到好大件事!

詩:你搞大咗女朋友個肚呀?

險搞出人命

洪:梗係冇啦!不過仲大件事過大肚,有個女朋友為咗我自殺!我同佢拍咗拖2年,本來大家好好,係我唔識珍惜,覺得悶就嗌分手,點知佢喺半年內自殺咗幾次,有次警察打畀我,話佢嗌生嗌死。開頭都諗過同番佢一齊,但社工叫我唔好,話決定咗就唔好返轉頭,唔好令佢痛多次。

詩:咁真係好大件事。

洪:係呀!我唔係好識同女仔相處,甚至可以用「宅男」嚟形容我。細個嗰陣,我唔係好鍾意同女仔玩,覺得女仔比較高傲,寧願打機,直至中三發覺係自己問題,之後識咗第一個女友。

詩:我覺得男仔喺青春期唔鍾意同女仔玩,不過第一個男友對我好好,仲拍咗4年拖,雖然分咗手好耐,但依家仲有聯絡。之後兩次就畀人背叛,我係個幾樂天嘅人,人馬座凡事向好嗰方面諗,但嗰兩次都受咗幾大打擊,要半年先平復到。不過,如果我再拍拖,就唔會記住以前,因為我比較鍾意記住開心事。

影圈尋機會

時間可以令人淡忘痛苦,三位年輕人收拾心情重踏愛情路,入行後會否玩地下情?還是會大大方方拍拖?

陳:呢個圈子太多姿多采,我入行時其實仲同女友一齊,點知佢暗中查我啲短訊,後來仲明Check,之後多咗嗌交,我講咗好多唔應該講嘅說話,好忟憎,拍咗3年,終於都係分手!我好鍾意拍戲,女仔一定會呷唶,就算最初仲係支持,但之後會唔明白,點解拍一個十幾秒鏡頭,要用全日去拍,如果大家熟識呢行會好啲,我要搵個明白我嘅女朋友。

詩:雖然我依家冇男友,但都好明白,女仔一定會呷唶。

洪:我會Feel到有意思先會埋手,出吓街,工作同戀愛其實都可以平衡。家樂,你鍾意咩類型嘅女仔?

陳:淳樸女仔,好似詩雅村姑Feel都幾好!我鍾意乖啲嘅女仔,思想簡單,唔好諗得太複雜。

對電影老闆來說,投資一部年輕偶像電影,絕對是一個冒險,但對一班影壇初哥來說,拍攝一部電影絕對是一個機會!眼前3位影壇初哥洪卓立、詩雅與陳家樂,不敢辜負老闆所望,付出百分之二百努力,在這個夢工場實現自己的夢想。

洪:得到呢個機會真係好開心,不過初初見Mani(霍汶希),佢第一句就話「唔好蝕死我呀」,壓力真係好大!

詩:我都係呀!我喺戲入面好多愁善感,但本身我性格樂天,真係好大考驗。

陳:講演出經驗,我算係最新,但呢個角色好有發揮,要做學長,仲講我暗戀詩雅,雖然平時好Friend,但拍戲始終有壓力,想做好啲。

村姑嗒唔落?

詩雅與洪卓立因拍攝英皇電影《很想和你在一起》而傳緋聞,但詩雅在洪卓立眼中就像孔雀石綠,總是嚥不下口!他更聯同好兄弟陳家樂取笑詩雅似村姑,似乎沒有憐香惜玉,但洪卓立是真的冇Feel?還是笑者愛也,怕被「驗毒」?看來只有他最清楚!

化妝:Meegan Seak(詩雅)

髮型:Will@Chin.G(陳家樂、洪卓立)、Zap@Chin.G(詩雅)

服裝:double dott(詩雅)、izzue(陳家樂、洪卓立)

文:呂曉風

攝:秦健輝