劉倩婷：「冇整過容，全身都係正版，你估我係MJ（米高積遜）咩？」

解　讀：應屆港姐冠軍劉倩婷被指整容，佢竟然用MJ做擋箭牌，點知被MJ粉絲鬧爆，話真係唔可以亂講㗎！你估自己真係MJ咩？

許　愿：「佢愈睇愈順眼！」

解　讀：「若要人似我，除非兩個我」，點知許愿真係有兩個我，許愿同「女版許愿」林潔瑜惺惺相惜，難怪許愿話林潔瑜愈睇愈順眼啦！

林潔瑜：「大家都欣賞我嘅內在生命，已將我嘅一言一行看在眼內，放在心上！」

解　讀：落選港姐瑜瑜好聰明，知道大家好欣賞佢嘅內在美，而唔係外表，可惜選港姐要美貌與智慧並重，難怪……

鄭裕玲：「依家我連娛樂新聞都冇睇，總之冇眼睇！」

解　讀：今屆港姐質素被指是37年最差，連無綫嘅嘟姐都話冇眼睇，梗係啦！如果唔用心睇，唔通真係用眼睇咩？

阿　倫：「若要人不知，淨係話我知，若要人人知，就講畀志偉知！」「我好Open，高齡有高齡做法，盤古初開自有妙法。」

解　讀：劉德華終肯確認朱麗倩「華嫂」地位，阿倫身為過來人當然知道秘密唔易守，佢身邊有志偉做傳聲筒，志偉食咗誠實豆沙包，當然和盤托出啦！

文：專案組