06/09/2009

播放本新聞相關短片

任達華與女傾電話變綿羊

任達華出名係娛樂圈嘅廿四孝爸爸,對囡囡Ella錫到加零一。小小So早排撞到佢,講起世界政經大事同豬流感嘅問題,點知佢愈講愈有火,又話政府呢樣不力嗰樣不力咁!傾到一肚火嘅華哥打電話返屋企,咁啱係佢個寶貝囡囡Ella接電話,態度即刻溫柔晒,仲好冧咁講:「係咪Ella呀?」之後再同小小So傾偈已經收晒火,仲拎咗小小So本記事簿,畫番啲平日同囡囡喺屋企畫嘅畫,仲好有心機、一臉慈祥咁同小小So逐幅講解添!當佢畫完晒後,小小So好自然拎番本記事簿,但已經變為「華哥畫集」啦!不過,華哥又拎番本簿,撕咗嗰幾張「大作」落嚟同講笑咁話:「拎番先,費事你拎上網賣!」

計小小So話齋,華哥唔係怕拎上網賣,實情係想拎返去屋企,畀寶貝女Ella睇啦!