諸葛梓岐挾着諸葛亮後人之名勇闖日本時裝界，名氣似乎比同行的香港o靚模Angelababy和周秀娜稍勝一籌，連曾經與章子怡傳緋聞的日本鑽石王老五、富商青山光司亦對她另眼相看。
青山光司昨日乘坐價值6,500萬日圓（約540萬港元）的勞斯萊斯到達會場，他透露三位o靚模中只認識諸葛梓岐，前日亦已跟對方見面，他說：「我有睇過《赤壁》，知道佢係諸葛亮後人，覺得佢幾好、好靚，我哋見面傾公事，遲啲會同日本大型電話商搞上網，有意搵佢！」但他否認有意追求對方：「冇諗過！佢有冇男友冇所謂，做到朋友已經好好。（咁Baby同諸葛邊個靚啲？）香港好多靚女，兩個喺日本都會紅。」
至於梓岐直言不敢「高攀」青山光司，她笑說：「佢係鑽石王老五，我又唔係鑽石，襯唔起佢，同埋我有男友。（男友點支持你？）佢叫我努力啲，但冇嚟。」她希望可放多些時間在日本發展，被取笑冇時間拍拖時，她大發嬌嗔說：「我冇講過！你話咋！我畀心機做嘢，男友會支持我！」