早前擔正主演電視電影《南華夢飛翔》的何浩文（Dominic），本身是跳舞組合BRO5成員，雖然已有一身好舞功，但Dominic原來是兩年前才開始學跳舞：「我以前學彈琴，仲學到五級添！不過後尾覺得唔適合，就放棄咗。其實我係一個好動嘅人，鍾意溜冰、打籃球同踢波，所以跳舞都啱我，不過又好搞笑，我兩年前先開始學跳舞，因為嗰時去英國讀書嘅時候，識咗班跳Hip Hop嘅朋友。」
Dominic直言以韓國跳舞歌手Rain為奮鬥目標：「我好鍾意佢嘅身形，而且佢表演嗰時好吸引。」他又自言是在「意料不及」的情況下加入娛樂圈：「有日排排吓舞突然有人叫我出去，初初好驚，以為佢鬧我未交場租，後尾先知原來佢哋問我有冇興趣加入BRO5，加上我鍾意唱歌，就係咁一拍即合！」