幸福天后陳慧琳（Kelly）昨日產後首度現身，出席代言的美心月餅「人月團圓」記者會，以Gucci套裝配Sergio Rossi 4吋高踭鞋。Kelly分享為人母親的生活：「每日最重要係餵奶同換片，習慣跟晒BB！有次換屎片，Alex頂唔住走咗出房，搞到我要自己換！」她透露兒子劉昇（Chace）重12磅：「佢唔難湊，仲認得我把聲，不過我抱佢抱到手瓜都硬晒！佢個下巴成隻蝦餃咁，好想食咗佢！」
激動否認借肚生B
初為人母的Kelly，首度離開寶貝仔開工，不禁眼濕濕說：「好唔捨得！（分開幾個鐘啫！）我聽日（今日）去新加坡呀！（去好耐？）一日囉！惟有出門之前錫到佢塊面燶晒先！我都知要慢慢適應，不如轉話題，等我平復下先啦！」記者即讚她身材Fit，但她仍不滿意：「依家121磅，未生之前係112磅，以前啲褲都未着得番晒！」對於內地傳媒指Chace並非她所出，Kelly即激動地說：「莫名其妙！呢一刀真係好唔抵、好傷！」雖然口說辛苦，但她仍有意再生，更減少工作湊仔1年：「推咗10場巡迴演唱會，仲有電影，主要做活動同拍廣告。」估計單是巡迴演唱會的歌酬，她已損失千萬元！
另外，對於近日楊千嬅、劉德華及黎明被爆已婚，Kelly力撐各人考慮的因素不同：「私人嘢唔講出嚟，唔代表唔坦白，唔通屁股生瘡都講出嚟咩！」她指以為千嬅是事業型，對方已婚令她最意想不到。
潮媽愛子4式
潮媽陳慧琳超錫囝囝Chace，囝囝出生前後都細心照顧，是一等一好媽媽！
豪買用品 Chace出生前，Kelly買入逾萬五元的多用途BB車及萬元BB床！
密封B籃 Chace出院時，Kelly用白紗布密封BB籃，又示意記者減低聲浪，怕嚇親愛兒。
潮B包裝 牛年出生的Chace經潮媽打扮，着上乳牛衫仔見大家，可愛又夠潮！
推Job湊仔 為了專心照顧Chace，Kelly狂推10場演唱會，又暫停接戲。