昨日2R以電子產品代言人身份現身《香港電腦通訊節2009》，打扮性感的Rosanne與妹妹黃婉佩（Race）擔任攝影比賽模特兒，吸引大批龍友到場。
兩人表示已第三年跟該品牌合作，談到續約，Race卻爆家姐另有大計：「今年應係最後一年合作，家姐有嘢宣布。」Rosanne甜絲絲地說：「係呀！我年底結婚喇！」她表示因未婚夫家人保守，故只透露對方姓白、身高185cm、是中英混血兒牙醫，在英國擁有診所。兩人相識八年，於兩周前訂婚，不願透露情史。問到求婚過程，Rosanne說：「之前成家人同男友去法國旅遊，嗰刻所有人行開晒，佢突然拎住戒指跪低，我傻妹嚟，即刻喊！佢話想一生一世同我一齊，我答佢『Yes，I Do！』」她爆未婚夫求婚前，早獲其父母及妹妹批准，Race更偷拍有影冇聲的求婚過程。
否認奉子成婚
問到閃電結婚是否「有喜」，Rosanne說：「唔係，我都想！好鍾意小朋友，婚後會不設防，最想生孖胎。」至於擺酒方面，她坦言安排中，新加坡與香港亦會設宴，預計在教堂行禮，兩個妹妹則擔任伴娘：「新加坡係女家嗰邊，應該簡單啲；香港係男家，可能隆重啲。佢有兩個哥哥，今次係佢屋企第一次娶新抱，遲啲會返香港開診所。（為你？）唔係，佢屋企人都喺香港。」談及欣賞未婚夫甚麼，Rosanne指着心口說：「個心囉！佢好孝順。」Race搶答：「勤力、人品好、有正義感、靚仔！」問到婚後會否退出娛圈？Rosanne說：「依家好少幕前演出，最近同妹妹籌備一隻教小朋友普通話嘅DVD，遲啲去康城搵買家。（同未婚夫？）希望啦！」此外，網上發現多張Rosanne前年及去年與外籍男士旅行的合照，未知其中一個是否其未婚夫。
閃電結婚嚇一驚
圈中有多位藝人在毫無先兆下宣布結婚，認真唔聲唔聲，嚇你一驚！
周慧敏、倪震
O嘴度：★★★★★
兩人曾分手又復合，去年底倪震與張茆在夜場熱吻！其後男方發表聲明引咎分手，7日後，他再發聲明宣布與周慧敏結婚。
徐淑敏、黃浩
O嘴度：★★★★
去年與黃重生分手的徐淑敏，早前突然傳出與剛相識兩個月的男友黃浩於年底結婚，雖然有傳徐淑敏奉子成婚，但她否認其事。
蔡少芬、張晉 O嘴度：★★★
07年12月，被傳與陳法蓉譜斷背情的蔡少芬，突然發結婚聲明宣布與張晉結婚！
汪明荃、羅家英 O嘴度：★★★
兩人拍拖長達20年，經家英多次求婚，他們於本年5月突傳喜訊，宣布在拉斯維加斯註冊結婚。