葉文輝(啤梨)對於近日不少青少年及中學生吸毒感心痛,並創作新歌《正氣歌》為他們打氣,還邀得好友MC Jin合唱。日前兩人出席活動,啤梨透露新歌是向年輕人發放正面訊息:「最近社會風氣好差,有歌迷打嚟電台,話佢喺學校畀同學恐嚇,仲逼佢吸毒,佢唔夠膽同屋企人講,最後我鼓勵佢搵社工幫手,好快就搞掂晒。」啤梨坦言聽到此事後令他更有衝勁組織啤梨義工團:「新歌MV特別搵咗一個十六歲嘅青少年幫手,畀機會佢發揮,雖然有少少唔放心,但都要放手畀佢試吓。」
近日與不同歌手合作的MC Jin表示,有很多人對Hip Hop及Rapper戴有色眼鏡:「有種負面感覺,希望自己可以用身體力行為社會帶嚟正面訊息。」