樂壇新人溫家恒(Vincent),對於早前被指藉故親近吳雨霏(Kary)之報道大感無奈,Vincent解釋與Kary在讀書時期已認識,二人一直是好朋友關係:「我哋成日約埋一齊放狗,係純友誼關係。我覺得篇報道話我趁Brian(洪立熙)唔喺度苦纏Kary,真係好無稽,因為當晚Brian全程都喺度,並唔係報道所指咁臨尾先到。」
Vincent又表示覺得有人有心針對:「嗰間報館寫到我好似溝女王咁,真係唔出聲唔得,我好介意佢哋話我奀星,呢個字眼好難聽。」雖然與Kary傳緋聞,但Vincent卻表示日後還是會相約對方外出:「我哋根本冇嘢,所以唔怕畀人影。」