腹背受敵的Yumi，先發生爆房事件，再被影射涉及金錢交易，以致形象插水，想不到師姐趙碩之（Wylie）雪上加霜，斥她男女關係混亂，令她壓力爆煲，昨日作出淚的控訴！

趙碩之被指扮大家姐，對師妹態度欠佳。 資料圖片

放大圖片

Yumi昨日接受本報獨家訪問時情緒激動，多次嚎哭，要助手從旁安慰。再度否認援交的她，怒斥師姐Wylie存心誣衊，她氣憤地說：「佢同我同一間公司，點解唔幫我？佢根本唔知真相，就亂話Jamie有女友，我同佢不嬲冇乜兩句！（最唔開心係乜？）佢話我手緊，仲話食飯幫我畀錢，但我哋從來冇一齊食飯。報道出街後，媽咪問我點解要問人借錢，我話冇，但媽咪話Wylie咁講，估唔到連屋企人都信佢唔信我！」

不滿扮大家姐

Yumi表示寫真集推出後工作量大增，加上有點積蓄，絕非手緊。問到是否覺得被師姐出賣，她激動地說：「佢唔係出賣我，係誣衊我！我同佢最多只係打招呼，連嘢都唔講多句，佢從來冇打電話畀我，點會知我咁多嘢？」問到是否不和，Yumi即踢爆Wylie經常「恰」她：「我錄賀年歌遲到，佢好惡咁鬧我；工作人員問我食乜飯，佢又唔畀我揀。佢份人好情緒化，心情好就同你講笑，心情唔好就搵人發洩，而且要人哋聽晒佢講。（扮大家姐？）都係㗎！反而戴夢夢冇乜話我。」她表示日後見到Wylie亦會加倍小心，絕不與她傾心事，以免被唱衰。

受壓激瘦8磅

備受壓力的Yumi雖沒有想過自殺，但因心情難過及睡不好而激瘦8磅，報道出街後，她痛哭10小時，擔心影響事業：「記者畀啲相老闆林建名睇，佢睇咗好嬲，叫咗我返公司照肺，話咗我兩粒鐘，當時我驚得好緊要。」她坦言事業受影響，正斟洽的廣告客戶亦重新考慮她。問到有否後悔到酒店過夜，她說：「有，以後唔做呢啲嘢，正常男女都OK，但公眾人物唔應該咁。」她揚言當街畀錢對她構成最大陰影：「以後男女都唔會當街畀錢！」

不吐不快Yumi，還在Blog上張貼一篇名為「我有好多嘢想澄清」的文章，指摘Wylie亂講，又表示與Melody關係最好，暗示與Wylie感情欠佳。