依家o靚模風吹遍全城，Deep V背心水着相日日都有，連食雪糕、刷牙都要玩性感，小小So識好多唔少有女初長成嘅父母，唔多唔少都擔心！早前同王敏德（Michael）傾開佢兩個女喺Facebook嘅相被登出嚟，當中仲有水着相，佢當堂皺晒眉，仲話要即刻返屋企要阿女開晒所有放喺網上嘅相畀佢過目。
Michael話其實兩個女着衫算係保守，唔會日日都少布：「去游水着泳衣係正常，但佢哋啲相上次畀人登過，我好嬲佢哋點解仲唔好好保管啲相！」佢自認係開明嘅父親，同仔女好似朋友咁咩都會講，仲話好直接咁教兩個女Safe Sex嘅重要性：「佢哋都係人，總有遇到某啲Moment，我制止唔到。我會話畀佢哋聽，男人喺某啲時候諗啲乜。」雖然Michael同老婆馬詩慧都係天橋上公認嘅靚仔靚女，但身為過來人嘅佢，講到明唔畀兩個女做o靚模：「出吓活動行騷冇問題，最緊要讀好書。」