今年真係傅穎(Theresa)嘅是非年,先傳與同門姊妹鄧麗欣不和、跟住又被走音事件困擾,再有傳成為金牌大風棄將,最近有關愛情騙子嘅是是非非又傳個不停,真係頭頭碰着黑!
小小So睇住Theresa入行,識咗佢好多年,坦白講Theresa真係一個好上進同好勝嘅女仔,而且鬥志頑強,愈畀人踩低,佢就愈要爬起身,有次小小So同佢傾偈,Theresa表現出唔輸得嘅一面。
小小So:成日有傳金牌唔要你,驚唔驚呀?
Theresa:一時In一時Out,唔理得咁多,太多新聞嘞!
小小So:同金牌大風仲有幾耐合約?
Theresa:唔可以透露實際日子,大約兩、三年啦!
小小So:仲有咁長時間,擔唔擔心呢幾年唔好過?
Theresa:唔怕!我對老闆有信心,佢畀到信任感覺我,始終自己係唱片公司嘅資產,自問有能力可以幫公司賺錢,我一啲都唔擔心喎!