所謂樹大招風,近日憑人形攬枕而在動漫節出盡風頭的Chrissie,繼日前被才女白韻琴及袁彌明先後指她的攬枕似吹氣公仔及高潮物之後,昨日有報道指身家暴漲的Chrissie,如此瞓身行性感全受男友指使,該報道又指她辛苦賺錢為包養男友,又指她有意買下將軍澳豪宅,與男友同居等!
近日是非浪接浪的Chrissie,昨晚錄影無綫《美女廚房天堂地獄爭霸戰》時,入錄影廠前更爭取時間,邊化妝邊大方接受訪問。對於被指半年勁賺400萬元兼買豪宅安頓家人及男友,心情大靚的她大賣關子:「呢半年嘅收入我係好滿意,但未至於去到呢個數,實質賺幾多就唔講喇!(一次過畀錢買樓?)梗係唔係啦!我淨係睇吓咋!我又唔使一定話要買豪宅,主要都想住番香港區!」
Chrissie更力撐男友並不是她行性感的幕後黑手:「唔好話佢慫恿我剝衫咁誇張,佢好錫我、支持我!」曾受情傷的她強調兩人經濟獨立,男友絕不是軟飯王:「我識佢嗰陣已經事業有成,我唔會再蠢第二次!我同佢財政分開,平時出街食飯佢都會畀錢!」她更否認父親「有女唔認」:「我嘅底線係我屋企人!我先旨聲明我阿爸唔係圈中人,有記者突然衝出嚟,佢梗係唔識反應!家人一路都好支持我嘅工作!」
否認影鹹相
全程鎮定的Chrissie,提到袁彌明抨擊其人形攬枕是滿足男人性幻想而設時,她即不耐煩反擊:「女人畀到男人性幻想好好,唔係點叫做女人?其實每個幫我做攬枕嘅人,都當嗰樣嘢係潮物同Fashion嘢。(攬枕被指高潮物唔開心?)每個人都有自己嘅諗法,我唔知人哋咩目的,所以唔會唔開心!」Chrissie又否認寫真照是鹹相:「每個人睇法唔同,視乎心態,你問我我就唔覺得係囉!」
另外,對於何超儀近日在Blog上爆粗鬧o靚模影響娛樂圈的風氣,Chrissie即若有所指地說:「我覺得每個人講嘢都有佢哋嘅目的嘅,我唔知(佢哋嘅目的)。(你都低調啲?)其實我一向都好低調(口架)喎!」