03/08/2009

播放本新聞相關短片

七小福50周年:周星馳一句說話 元秋復出有運行

在銀幕上展現硬橋硬馬真功夫的元秋,私底下其實不乏柔情一面。當年因為兒子在長途電話中淒涼喊着:「媽咪!媽咪!」而不忍,為家庭毅然放棄演藝事業足足二十一年長。

談到當年淡出,元秋嘆口氣唏噓地說:「當年拍咗兩部戲成績都唔係幾好,咪索性收山囉!我最記得有一次喺韓國拍戲,一打電話返去個仔就係咁喊:『媽咪!媽咪!』我自己咪又跟住喊囉!後來諗落始終唔捨得個仔,就決定放棄喇!」

陪試鏡無心插柳

二十多年來一直相夫教子的元秋,直至一次機緣巧合下,才再拾熱情重返影壇,而她的貴人,眾所周知是當年找她出山拍《功夫》的周星馳。「後面一邊食煙、一邊睇報紙嗰個,同我行出嚟!」全靠周星馳一聲令下,令本已無心戀戰的元秋東山再起。對元秋來說,《功夫》中包租婆一角,可說是「無心插柳柳成陰」的寫照。

元秋笑說:「其實嗰陣我只係純粹陪元輝同元菊去試鏡,我最記得當時周星馳叫元菊做啲表情畀佢睇,我只係匿喺後面睇報紙,跟住周星馳就叫我行出嚟嘞!可能佢貪我食煙個樣夠衰啩!哈哈!」

雖然被星仔點名演《功夫》,不過由於已有二十一年沒接觸電影,所以對重返幕前,元秋難免內心存疑,全靠星仔再三保證「唔掂傾到掂」,以及保證《功夫》幕後班底有七小福成員助陣,她才答應接受這個挑戰,不過到正式開拍時,還是有很多不習慣的地方,她說:「一來冇劇本,以前拍戲都唔會咁嘅,而且個戲名又先後改過三次,都唔知邊個打邊個。唯一一樣嘢好過以前嘅,就係有個Mon可以睇番Playback囉!」

最難忘瞬間脹爆

凡事講求因緣際會,做人往往就是這麼「巧合」,接着元秋的片約便一部接一部,可能很多人都認為元秋是「行尾運」,但其實背後是不無付出的,她說:「嗰陣星爺要我增肥廿四磅拍戲,我真係日日係咁食奶粉谷肥自己,仲有醫生幫我控制體重添!」

不過,對於自小已是精力充沛的元秋來說,淡出影壇這麼多年自不會無所事事。當年亦有嘗試做生意,只是最後碰壁收場:「嗰時我有做飲食生意,但係就蝕到阿媽都唔認得,之後都有搞過私人Bar,主要都係招呼啲熟人。」

銀幕上的包租婆,雖是惡形惡相,卻是古道熱腸;現實中的元秋也是不謀而合,大情大性、豪邁率真,何止義氣仔女,更有着一股大家姐本色。當年若非這位大家姐,睇怕師妹元香早已魂歸天國,還哪來今天再與七小福濟濟一堂,重溫童年往事那麼溫馨!

邊個港姐最靚?立即投票!
詳情瀏覽on.cc《香港小姐2009》