呢排班嫩模推出寫真集，小小So梗係唔執輸，早幾日都有落場睇吓！撞啱嗰日係周秀娜（Chrissie）獻吻簽名會，雖然事後有好多人話呃鬼，只係取巧地隔住塊膠片錫錫，但小小So現場直擊一班宅男Fans冇投訴，話佢只係眼定定望住娜姐嘅34D完美身材已經無話可說！有幾個攞咗籌等朱薰簽名嘅Fans，更加靜靜雞過檔去周秀娜條隊攞簽名，好彩冇畀人發現。
小小So見娜姐魅力非凡，當然幫襯買番本，睇吓內裏有乜乾坤啦！小小So坐巴士返屋企途中已經忍唔住拆開嚟睇，嘩！172頁嘅寫真裏面，有大半都係三點式泳衣，小小So不停揭，後面一對母女就不停望，仲俯身傾前45度愈睇愈開心，佢哋落咗車之後，坐後排嘅一位大叔又突然坐喺小小So後面，原來又係想一睹娜姐風采！邊個話嫩模好難入屋？周秀娜就係一個特別例子！