扮靚是女孩子的天性，07年國際中華小姐冠軍宋熙年亦不例外，她隨身的護膚用品多達十多種，包括護理手部、面部及身體其他部分等。不過，知慳識儉的熙年每次都物盡其用，連一滴都不會浪費，她說：「護膚品差唔多用到尾嘅時候，樽入面其實仲剩番好多，我會將佢倒轉，剩餘嘅Cream就會滴落預先放好嘅另外一個樽仔度，樽仔方便放入化妝袋，天氣乾燥時可以即刻用。」
特別注重手部護理的熙年，經常試用不同牌子的潤手霜，想不到不同形狀的潤手霜亦可以當作慳錢秘笈，她笑說：「我發現牙膏裝比較抵用，每次以為用到冇嗰陣，用力壓一壓尾部，又會擠到好多Cream出嚟，但我建議唔好買用鐵皮做包裝嘅Hand Cream，我試過屈一屈就穿咗個窿，漏晒啲Cream出嚟，連個袋都污糟埋，簡直係得不償失。」
