新進「電車女神」Chrissie愈紅愈多人插，有13歲男童不吃不喝慳錢購買其陪瞓攬枕，引起社會關注。曾以性感形象示人的袁彌明、莊思敏及諸葛梓岐，也對此看不過眼！

袁彌明昨日出席其新店開幕時有骨地說：「我唔肯舔雪糕，又唔肯刷牙，冇得做喎！做到咁爛，冇需要囉！」問到是否覺得o靚模過火，她認為沒有客觀標準，只有主觀底線：「要我趷籮影相，冇可能！」愈講愈㷫的她，更暗示o靚模惹人犯罪：「咁多人拍Playboy，係就認咗佢啦！唔好話自己冇問題，唔好話自己健康，話自己係Model，我覺得好奇怪囉！」談及Chrissie的巨型攬枕，她語帶雙關說：「咁出『潮物』真係冇嘢講，但係『高潮』嘅『潮』，唔係『潮物』嘅『潮』！擺明車馬就認咗佢啦！呢啲係滿足男人嘅性幻想，過多幾個月，大家就會睇到悶，嗰時就係佢哋沒落嘅時候。」

莊思敏：係發洩用

曾自稱並非o靚模的諸葛梓岐，昨日亦對Chrissie的攬枕偉論滔滔：「連13歲嘅小朋友都買，家長最好教導吓，鍾意一個女仔唔係唔啱，但唔好做咗錯嘅方面囉！」

諸葛梓岐與莊思敏對周秀娜的攬枕有微言。

莊思敏

另外，早前公開插爆o靚模的莊思敏，前晚在時裝店活動上繼續發炮，更寸爆Chrissie說：「嘩！好勇敢、好大膽嘅嘗試，始終攬枕係發洩用！（發洩？）我意思係打交用，仲要放自己嘅相上去，好多人打架！」她在活動上與八模兵團碰頭，問到是否尷尬，她說：「冇喎！講咗就係講咗！」問到是否對o靚模改觀，她說：「未必係個人問題，有時公司做嘢過火，影響風氣。」她還認為非禮事件與o靚模不無關係：「唔多唔少都有關，大家都咁熱血，太興奮好易失控！」她亦認同吳彥祖指o靚模不能行天橋的言論，並睇死「o靚模熱」在冬天便會冷卻。

Chrissie密謀買大屋

至於是非「風眼」Chrissie前晚亦有出席時裝店活動，但因姍姍來遲而與莊思敏緣慳一面，對於莊思敏認為o靚模性感與非禮案有關，她出言反擊：「我覺得完全冇關係囉！兩樣嘢唔可以拉埋嚟講，要對女性有尊重，呢啲係個別事件！」另外，她打算於動漫節最後一天到會場答謝Fans，問到會否再次派吻，她說：「唔會喇！買咗個攬枕可以抱抱我囉！又可以帶我同爹哋食飯。」豬籠入水的她揚言，正儲首期購買逾千呎大屋！