娛樂圈有唔少歌手同藝人都係基督徒，好似謝安琪、朱茵、蔡少芬、王祖藍、陳法蓉同關心妍（Jade）等，大部分都做到一個虔誠教徒，小小So都好安慰，至少佢哋搵到一個寄託。小小So日前出席咗個私人Party，收到風Jade開始四處派帖，仲千叮萬囑叫收帖嘅人唔好爆料，因為唔想有記者追訪，但係用小小So嘅角度去睇件事，做得教徒就唔應該講大話，加上呢件係人生大事添，點解唔大方去公告天下？唔通佢怕冇人祝福？
其實小小So好早已經收到呢個風，當時仲向佢求證過，點知得到嘅答案係「冇咁嘅事」、「邊個講」，當小小So同佢講有人已經有佢張帖，Jade就開始口震話知係咩事，仲暗示因為續約問題畀人出賣。坦白講，結婚係開心事，唔明點解唔認，最慘係班記者已經有晒佢擺酒日期同地點！
人生大事愈嚟愈逼近，關心妍亦知道婚訊冚唔實，最終要喺個人網誌留言，以「禮物」為題，並寫上「我知道你們等得很焦急，放心吧，合適的時候就會公告天下喇」，似為十月的婚禮鋪路。