姚子羚與黃嘉樂在《烈火雄心3》，將與扮演有婦之夫的陳展鵬譜出三角苦戀，原來現實中，姚子羚及黃嘉樂亦曾分別陷入三角苦戀，更受盡挫敗，難怪他們自嘲為「大輸家」。最怕做第三者的姚子羚透露，曾被有婦之夫追求，但她無動於衷：「我接受唔到有婦之夫，因為我唔想做第三者、唔想破壞人哋嘅婚姻！雖然我好怕三角戀，但係亦受過三角戀嘅折磨，記得以前喺澳洲讀書嗰陣，發現男友一腳踏兩船，感覺好痛心，好似畀人背叛咁！雖然我有原諒佢，但最終我哋因為分隔異地而分手！」

姚子羚與黃嘉樂均曾被愛侶劈腿，大受打擊。

堅拒做第三者的姚子羚，曾被有婦之夫追求。

愛情麵包難取捨

至於黃嘉樂則認為愛情並非飲「水」飽，一定要有「麵包」配合：「以前覺得愛情應該好簡單，不過經歷過被對方一腳踏兩船後，對愛情嘅憧憬減退晒，再加上曾經有女朋友話我經濟條件唔達到佢嘅要求，令我大受打擊之餘，仲明白愛情其實好現實，所以我冇幾千萬喺手都唔會結婚！」